SESORAH BASA JAWI " PENGETAN DINTEN KARTINI"

LOMBA SESORAH  BAHASA JAWA TINGKAT KECAMATAN ,SABTU, 22 APRIL 2017

TEMA : KARTINI MASA KINI, YANG CERDAS DAN MANDIRI

(IRAH-IRAHAN :  KARTINI WEKDAL PUNIKI INGKANG WASIS LAN MANDHIRI )

KASUSUN DENING : ENI SETYOWATI, S.Pd.

Assalamualaikum warohmatullohi wabarakatuh,

Nuwun, Sugeng enjang /  sugeng siang, Bapak Ibu Dewan Yuri Lomba Sesorah Basa jawi ingkang kinabekten, saha para rawuh ingkang dahat kinurmatan.

Ingkang sepisan, langkung rumiyin sumangga kita memuji wonten Ngarsanipun Gusti Ingkang Maha Agung, awit saking keparengipun paring karohmatan dumateng kita sedaya, saengga kita tansah ginanjar kawilujengan, saget makempal wonten ing wekdal punika.

Kaping kalihipun kawula ugi ngaturaken matur nuwun sanget dumateng panitia pengetan dinten Kartini tingkat  UPT PAUD lan SD Kecamatan Karangmojo, ingkang sampun paring wekdal dumateng kawula saperlu ngaturaken sesorah kanthi irah-irahan “ Kartini Wekdal  Puniki Ingkang Wasis lan Mandhiri “

            Ingkang salajengipun kawula ugi nyuwun pangapunten ingkang ageng awit sampun nggempil kamardikan panjenengan, para rawuh sedaya.

            Bapak ibu para lenggah ingkang minulya,

Pengetan dinten Kartini ingkang dipun adani  tanggal 21 April saben taunipun dening sedaya masyarakat, kantor-kantor, saha dinas pamarintah, kagungan makna ingkang ageng dumateng kita sedaya , mliginipun kagem kaum wanita.

            Pengetan menika kangge mengeti dinten wiyosipun salah satunggiling putri  ingkang anggadahi, kagungan ati, manah ingkang suci lan luhur, injih menika asma Raden Ajeng Kartini ingkang miyos tanggal 21 April tahun 1879, wonten ing kutha Mayong tlatah Kabupaten Jepara, Jawa Tengah. Ramanipun asma RM. Adi Pati Arya Sasradiningrat, bupati ing Jepara. Ibunipun asma  Ngasirah, setunggiling wanodya saking kawula alit, kawula biasa. Tanggal 8 November 1903, R.A. Kartini nikah kaliyan Raden Tumenggung Arya Jaya Adiningrat , bupati ing Rembang. RA Kartini nalika semanten awit kepengin majengaken kaumipun ngripta pustaka ingkang judul  ‘ Habis Gelap Terbitlah Terang , menawi dipun jawaken “ Bar Peteng Trus Padang “

            Para lenggah ingkang dahat kinurmatan,

Cita-cita, pepinginan RA. Kartini injih menika mbudidaya emansipasi ( pembebasan) kagem kaum wanita, kersanipun  seimbang , selaras hak-hak antawisipun kakung saha putri.   Sinaoso awrat perjuanganipun RA. Kartini nalika semanten, ananging awit pambiyantu kaliyan dukungan saking rencang-rencangipun, sedherek-sedherekipun, ugi garwanipun, RA. Kartini saget majengaken kaum wanita kanthi ngedekaken pawiyatan-pawiyatan putri , sinaoso dereng trep dereng jumbuh  kaliyan cita-citanipun / pepinginanipun RA Kartini.

            Para lenggah ingkang minulya,

Ing titi wanci punika , kathah cara ingkang dipun tindakaken kagem mengeti dinten Kartini antawisipun ngagem ampilan adat jawa. Amrih lestantunipun ageman adat tradisional negara kita mliginipun jawa. Ananging ampun ngantos kita namung menggalihaken sanggul, kebaya  kemawon wonten ing dinten Kartini punika.

            Para lenggah ingkang kinurmatan,

Bilih sejatosipun, intinipun ,injih menika RA Kartini ingkang sampun nyetusaken,ngrintis  emansipasi kaum wanita, penyetaraan gender kagem kaum wanita sejati. Ananging sinaoso  mekaten , perjuangan RA Kartini mboten ateges badhe nyaingi kaum pria kaliyan ngesampingken kewajiban-kewajiban, tugas-tugas pokokipun setunggaling wanita utawi kaum wanita . Amargi kaum wanita lan kaum pria menika sampun anggadahi kodratipun piyambak-piyambak lan ugi kagungan peran piyambak-piyambak wonten ing gesang menika.  Piyambakipun bener-bener wanita ingkang anggadahi ati, manah ingkang suci, anggadahi cita-cita ingkang luhur kagem kemajenganipun wanita ing  negari Indonesia menika.

            Mila para lenggah sedaya,

Sumangga pengetan dinten Kartini menika kita dadosken semangat, kekiyatan,kita dadosken landesan kagem kita mliginipun kaum wanita Indonesia kangge mlampah wonten ing gesang salajengipun . Kangge nderek nyengkuyung pembangunan negari kaliyan bangsa kita. Menawi kita penggalih kanthi wening, hikmah , inti perjuangan RA Kartini menika sejatosipun perubahan. Kaum wanita kedah dados sosok, ingkang langkung sae kanthi saget nguasani, pirsa bab ilmu pengetahuan lan teknologi ingkang saget dipun udi wonten ing pawiyatan-pawiyatan.

 Sumangga kita tansah dados Kartini-Kartini masa kini , Kartini-Kartini wekdal puniki ingkang wasis lan mandhiri, kanthi cara makarya, ngudi ngelmi, ngabekti  dhateng kakung lan putra putri , tetulung dateng sesami, ngibadah dumateng Gusti kanthi ati/ manah  ingkang tulus lan suci.

            Para lenggah ingkang kinurmatan, sawetawis menika sesorah ingkang saget kawula aturaken wonten ing ngarsa panjenengan sedaya. Sakderengipun kawula pungkasi kawula badhe nyekar sesarengan kaliyan panjenengan sedaya.  Kersanipun mboten sepaneng, manah kita radi adem ayem makaten, Ananging nyuwun pangapunten suwanten kula mboten sekeco menawi dipun mirengaken. Menika mangke wonten pakar-pakaripun nyekar Pak Slamet, Pak Sadipan ingkang langkung pirso paugeran-paugeranipun.

Mangga nyekar Gambuh sesarengan.Sekar Gambuh menika kawula serat kalih ( 2 ) pada, kanthi adedasar paugeran-paugeran sekar macapat injih menika nggatosaken guru wilangan lan guru lagunipun. Sumangga para rawuh.  

Gambuh

Para kanca sedulur

Mangga-mangga kita sami ambyur

Nglestantunken budaya ing tanah Jawi

Mrih dados budaya luhur

Misuwur pantes cinonto

            Pra kanca ya dha jujur

            Mrih uripe tentrem tan cinatur

            Mugi-mugi tansah binerkahan Gusti

            Lurus lempeng dha lumaku

            Dimen anak putu nyonto

            Salajengipun kawula ugi badhe maca geguritan, kanthi irah-irahan  jaman iki wis banget tuwa ingkang dipun ripta dening Turiyo Ragil Putra.  Kawula remen sanget kaliyan geguritan menika , amargi maknanipun ageng sanget dumateng kita sedaya. Wosipun ngengetken dumateng kita bilih kemajengan jaman ingkang sakmenika sampun canggih , ananging ampun ngantos nilaraken paugeran-paugeran aji, pitutur-pitutur luhur tinggalan para leluwur.  . Sugeng angresepi geguritan menika :

Jaman Iki Wis Banget Tuwa

Karipta dening : Turiyo Ragil Putra

Ngger, anakku

Jaman iki wis banget tuwa

Kabudayan wis rontang ranting

Subasita mung kari crita

Aja maneh sinom, dhandhanggula utawa gambuh

Salarik guritan wae wis  ora ana sing nggape

Kejaba kerlap kerlipe lintang , ing langit kana

Kang setya ngrenggani sepine wengi

Binareng angambare cempaka sari

Wis ora ana tembang kinanthi

Sing biyen tansah methuk eseme rembulan

Nalika bocah-bocah dolanan jamuran

Wis ora ana , ngger

Kejaba swara tangis,

saka pang-pang lan godhong mlathi

Sing dumadakan ceblok

Tanpa daya ngrungkebi bumi

Jaman iki wis banget tuwa, anakku

Aja ngimpi, tembang guritan ngrenggani taman

Bocah angon galik-galik kekidungan.

            Mbok bilih cekap semanten ingkang saget kawula aturaken , wonten tata basa saha kirang ing subasita, sakestu kawula nyuwun samodra pangaksami. Matur nuwun.

Wassalamulaikum warohmatullohi wabarakatu.