KUMPULAN GEGURITANKU "WELING SINANDHING"

KUMPULAN GEGURITAN BASA JAWA :

KARIPTA DENING : ENI  SETYOWATI

1. PITUTUR
2. SARANA GURIT
3. WULAN NDADARI
4. KORONA JRONING GAMBUH
5. PITEDAH
6. BASA JAWA
7.VIRUS SASTRA JAWA
8. WISIK GISIKING WENGI
9. KASATYANE DWI SINTA
10. HANOMAN
11. LELAGON MATON 1
12. LELAGON MATON 2
13. LELAGON MATON 3
14. SAKDERMO TITAH
15. GURIT GUMANTINE WARSA
16. GUMBREGAN
17. AYO MANUNGSA
18. BEKSAN JAWA
19. AJINING JIWA
20. AKU ORA KELANGAN

Pitutur 

Karipta dening : Eni Setyowati

Para kanca sedulur

Mangga-mangga kita sami ambyur

Nglestantunken budaya ing tanah Jawi

Mrih dados budaya luhur

Misuwur pantes cinonto

            Pra kanca ayo padha  jujur

            Mrih uripe tentrem tan cinatur

            Mugi-mugi tansah binerkahan Gusti

            Lurus lempeng dha lumaku

            Dimen anak putu nyonto

Mendhem jero mikul dhuwur

Ngendhikane para leluhur

Dadya putra tansah tuhu lan ngabekti

Mring utamaning pitutur

Laku santun andhap asor

                                                                                    Gunungkidul,  Maret 2019

Sarana Gurit

Karipta dening : Eni Setyowati

Sarana gurit … .

Kang rinakit

Ambabar jiwa

Angambar sukma

Sarana gurit … .

Kang rinakit

Anggawe  atiku linempit

Mring godaning urip

Ameper hawa nepsu

Ambangun tumataning laku

Anggelar hayuning qolbu

Sarana gurit … .

Kang wus rampit

Muga dadya sarana

Anggayuh jantraning urip

Dadya sarana anggon kita

Angalembana ing Ngarsa

Kang Maha Kuwasa

                                                                                    Gunungkidul,    Maret 2019

Wulan Ndadari

Karipta dening : Eni Setyowati

Wulan andadari … .

Sumunar endah cumlorot

Ing lingsir wengi iki

Suara jangkrik

Lan kewan-kewan wengi

Anggawe atiku

Samsaya pingin  memuji

Mring Ngarsane Gusti

Kang Maha Suci

Jalaran aku bisa nekseni

Mring Agunging karyaning Ilahi

Kang nora bakal bisa kawilang

Dening dirji-driji iki

            Wulan ndadari … .

Sunarmu mertandani

Yen Kang Maha Ngayomi

Tansah madangi

Pepeteng jiwa lan ati

            Wulan ndadari … .

            Tekamu kebak piweling aji

            Kanggo pepenget umat ing bumi

            Supaya tansah eling lan nastiti

            Nyepakke sangu kanggo alam mburi

            Kang mesthi bakal kinanthi

            Kabeh antuk janji pepati

            Wus sinerat ing kitab suci

            Tanpa kinira amarga winadi

            Saking Gusti

Kang Murbeng Dumadi

                                                                        Gunungkidul,    Maret 2019

 “ Korona Jroning Gambuh “

Dening : Eni Setyowati

Warta kang lagi mumbul

Sajroning masyarakat kacatur

Anggawe udreging kahanan nagari

Kasebut  korona virus

Sumebar saka Tiongkok

Korona iku virus

Kang anggawe umyeking pangrungu

Mula kudu njaga dhiri uga lathi

Aja dha kakehan wuwus

Ujar kang pantes cinonto

Korona iku tatu

Kang nilas ing sajroning pandulu

Katon welo akehing banten pepati

Mangga kita sami guyup

Tansah asih asuh among

Korona iku mungsuh

Anggawe kahanan sarwa  kisruh

Mula kadang ayo padha meper ati

Njaga kawruh ingkang jumbuh

Ngugemi warta sayektos

Gunungkidul, Sabtu legi, 21 Maret 2020

***

   PITEDAH

Dening : Eni Setyowati

Aja dha kakean wegah

Mundak awakmu lungkrah

Aja dha kakean polah

Mundak uripmu pating blengkrah

Aja dha kakean trekah

Mundak  rezekimu nora berkah

Aja dha kakean slewah

Mundak  atimu kemramah

Aja dha kakean aluamah

Mundak dongamu nora diijabah

Kita sakdermi titah sawantah

Wus wayahe padha hijrah

Kanthi ati kang sumarah

Kanggo sangu laku ngadep manembah

Mring Ngarsane Gusti  Kang Maha Mirah

Gunungkidul, Kamis kliwon 26 Desember 2019

  Basa Jawa

Dening : ENI SETYOWATI

Basa Jawa kanggo sarana

Sarana ngudar  rasa

Kanthi cara nulis lan maca

ngugemi tata basa

Uga subasita

Basa Jawa kanggo sarana

Sarana mbabar rasa

Ben lega jroning dhadha

Mula para kanca

Ayo tansah  nggegulang basa jawa

Ben sansaya ngrembaka

Mukti kuncara

Dadi kekuwatane  budaya bangsa.

GK, RABU, 1 JANUARI 2020

***

VIRUS SASTRA JAWA

Karipta dening : Eni Setyowati

Virus-virus sastra jawa

Wus wayahe diwenehi hawa

Wus sak trepe dititipi nyawa

Ben dadya sarana anggelar rasa

Ben dadya warangka angumbar jiwa

Virus-virus sastra jawa

Tambaho ngrakut anggonmu sengkut

Mlebu ing sela-selaning jamrut

Jamruting raga, jiwa lan rasa

Dadya  pangendah bawana

Kanggo pangayom , pangayem lan pamrayoga

Agesanging manungsa ing mayapada

Uga  dadya pepadang

Ing tembe ngadep  mring Sang Hyang Maha Wenang

Kanthi  manthering diri lan ati

Linambaran  ajining budaya  jawi

Linandesan  kitab sucining Ilahi

Yogyakarta ( Hotel Neo Awana) ,Rabu, 27 November 2019

$$$$$$$$

WISIK GISIKING RATRI

Dening : Eni Setyowati

Tan krasa ing pangrasa

Rasa kang wengi iki ndadari

Ndadari saka obahing lathi

Satemah nunjem jroning ati

            Atiku wira wiri ..

ing gisiking wengi

            Wengi iki tanpa winates

Antarane raga lan jiwa

Antarane rasa lan sukma

Kang nora bisa ..

Kaucap  ing  kojahe manungsa

Nora bisa kinira ing netraning jalma

Yen wengi iki…

Bakal dadi wengi pungkasan…

 Uga bakal dadi wengi  kawitan…

Kang miwiti lan njalari

Tuwuh prenthule rasa handarbeni

Rasa hangrungkebi

Rasa hanetepi

Rasa hangayomi

Rasa hangleluri

Mring lestarine seni, sastra , basa lan budaya jawi

Kang  migunani lan murakabi

Saengga gawe pepadhang  bawana

bakal moncer sumrambah

Menyang  nagara  manca

Kebak pituduh , piwulang uga patuladha

Lantaran serat panyerat

Rinumat  jroning sastra kanthi murwat

Kanggo medharake  pangalembana

Mring endahing karyaning Sang Maha Panyipta

Yogyakarta( Hotel Neo Awana),  Rabu ratri,  27 November 2019

$$$$$$$$

KASATYANE DEWI SINTA

KARIPTA DENING : ENI SETYOWATI

Dewi sinta

Wus kalakon kadhusta

Kadhusta dening prabu rahwana

Kagawa menyang kraton alengka

Den pengin-pengini gebyaring makutha

Lan akehing raja brana

Uga dadya prameswara

            Ananging dewi sinta

Tetep teguh lan satya

Marang sri ramawijaya

Kang wus dadya gegantilaning jiwa

Dudu lumebering bandha donya

Dudu gumbebyaring tahta

Dudu moncering nama

Dudu dhuwure kasta

Ananging sucining rasa

Weninge jiwa

Tentreme sukma

Ajining raga

Tansah kajaga

Ing telenging atine manungsa

GUNUNGKIDUL, RABU, 1 JANUARI 2020

***

                                                                                         HANOMAN

        Dening : Eni Setyowati

GK, RABU,1 JAN 2020

Wujude wanara

Kethek sekti mandraguna

Kaparingan jejibahan

Dening kang nata

Prabu ramawijaya

Supaya teka ing alengka

Saperlu nulungi dewi sinta

Hanoman  njujug ing taman

Mulat marang kahanan

Ben nora konangan

Ananging hanoman

Bisa karangket lan karungkeban

Dilarak aneng pasowanan

Banjur antuk paukuman

Kaukum  obong jroning latu jilaladan

Hanoman kethek wasis

Banjur mabur pencolothan

Ana sakduwurure wit-witan

Lan wewangunan

Sedyane si rahwana

Durjana kang adigang adigung adiguna

Tan bisa kaleksanan

Amarga kang nora bener

Lan nerak wewaler

Mokal bisa nrajang pager

Pagering bebrayan suci

Kang wus manjer Jroning ati

$$$$$

LELAGON MATON ( 1 )

Dening : Eni Setyowati

(GK, Sabtu Wage  4 Januari 2020)

Siji loro telu

Tangane sedeku

Mirengake bu guru

Menawa didangu

Papat nuli lima

Lenggahe sing tata

Aja padha sembrana

Mundhak ora bisa

Kuwi lelagonku

jaman cilik nalika iku

dituturi dening guru

tetep dumeling neng pangrunguku

enem pitu wolu

ayo padha sinau

aja dha grusa grusu

temen golek ngelmu

sanga nuli sepuluh

greget sing ngangsu kawruh

manteb lan uga jumbuh

apa sing kok gayuh

iku lelagon  maton

dudu gugon tuhon

kanggo urip kang ora waton

ora mung cukup ing pacelathon

ananging kudu dadya pangilon

$$$$$$

LELAGON MATON (2)

Dening : Eni Setyowati

(GK,Sabtu Wage  4 Januari  2020)

Kidang talun

Anak-anak talun

Mil kethemil

Mil kethemil

Si kidang mangani mbayung

Kuwi lelagonku

Jaman mbiyen naliku iku

Kanggo panglipurku

Sangu anggonku turu

Sing dikidungake dening bapakku

Kanthi epek-epek tangan loro

Katangkepke dadi sajodho

Memper sirah kidang

Kang kupinge pating jepaplang

Banjur dijogetke

Katon ayang-ayange

Kasorotan senthir lenga potro

Eneng tembok dumeling pring

Kang dadi pagering papan

Kanggo ngaso

Saka obah mosiking kahanan

Kang tanpa kendho

$$$$$$$

LELAGON MATON  ( 3 )

Dening : Eni Setyowati

(GK, Sabtu Wage 4 Januari 2020)

 Yo pra kanca

Dolanan neng njaba

Padhang mbulan padhange kaya rina

Rembulane sing ngawe-awe

Ngelikake aja padha turu sore

Yo pra kadhang

Jagongan wedangan

Nuwuhake rasa ing paseduluran

Guyup rukun ro gegojegan

Ngrembakakke urip padha reruntungan

Kuwi lelagonku

Jaman semana wayah dalu

Tanpa ana rasa ngelu lan nesu

Bebarengan ro kanca padha ngguyu

Ngguyu kang kebak panemu satuhu

$$$$$

SAKDERMO TITAH

Dening : Eni Setyowati

GK, Selasa Kliwon, 31-12-19

Kita sakdermo titah sakwantah

Kang garising urip wus tinatah

Ana ing lauh mahfudte Gusti Allah

Mula kabeh yoga lan wayah

Uripmu aja dha sumlengkrah

Marang pranatan lan paugeran kang wus kaprentah

Ana ing kitab sucine Kang Maha Tinanggenah

Aja dha gampang motah

Aja dha mengangah

Aja padha sak wiyah-wiyah

Aja dha nggedekke aluamah

Ayo padha ngalah

Ayo padha sumarah

Ayo padha manembah

Ngluru jantraning urip kang berkah

Sakeng Ngarsane Gusti Kang Maha Mirah

$$$$$

 GURIT GUMANTINE WARSA

Dening : Eni Setyowati

GK, Selasa Kliwon Wengi, 31-12-19

Dina-dina ing taun - taun kang wus lumaku

Kebak maneka warna kahanan kang kudu kaulu

Saka rasa bungah tekan luruhe waspa pandulu

Saka lelakon kang gawe guyu

Nganti tekan rojah rajihing jiwa raga kang kebak tatu

Datan  bisa kabendu

Jer kabeh mau

Wus dadya kersane kang Maha Winentu

Mapag warsa enggal kang bakal tinuju

Adepana kanthi nastiti seko telenging qolbu

Ben uripmu tansah kalis ing bebendu

Lurus lempeng anggonmu lumaku

Laku  bener aja kasiku

Anggayuh panguripan jatu

Mugi tansah lumintu

Mring anak putu

Den basuki rahayu

Cumanduk warsa pinuju

Kanggo memayu hayuning sarira

Memayu hayuning kulawarga

Memayu hayuning sasama

Memayu hayuning bawana

Tansah nggegulanga endahing sastra

ajining  budaya  jawa

linambaran donga kang tansah rinumpaka

Myang Hyang Maha Kawasa

Datan kendat ratri lan rahina.

$$$$

GUMBREGAN

Dening : Eni Setyowati

GK, Selasa kliwon, 31-12-19

Kembang jambu

Sapine  ben lemu-lemu

Aminnnn

Kembang jarak

Pitike ben tansah ngarak

Aminn

Kembang klapa

Kewane ben rosa-rosa

Aminn

Kembang pring

Dina gumbreg malem jemuah pahing

Aminnn

Kembang tebu

Panene ben tansah lumintu

Aminnn

 Gumbregan….

Dadi pakulinanku nalika jaman semana

Minangka tradhisi jawa kang sansaya  musna

Gumbregan…

Tradhisi jawa kang ngemu patuladha

Sauger manungsa sapata

Kudu tansah asung puja syukur kebak pangalembana

Mring Ngarsane Kang Maha Kawasa

$$$$

 AYO MANUNGSA

Dening : Eni Setyowati

GK, Rabu Legi, 1 -1-20

Ayo manungsa..

Kita padha waskhitha

Ben tinebehno saka bebaya

Kalis ing rubida

Nir ing sambekala

Ayo manungsa..

Padha among raga

Ben tansah gagah pideksa

Ayo padha among jiwa

Ben tinebehna saka dur angkara murka

Ayo manungsa…

Aja padha luruh

Marang samubarang pangluruh

Aja padha ewuh

Ben ra kasatan pakewuh

Aja padha wanuh

Marang samubarang pepacuh

Aja padha mingkuh

Marang sadengah pitudhuh

Ben apa kang mbok gayuh

Urip tentrem lair batin tanpa sampyuh

Mesti bakal rinengkuh

$$$$$

BEKSAN JAWA

Dening : Eni Setyowati

GK, Sabtu Wage, 4-1-20

Angenam raga

Anggelar jiwa

Ambabar rasa

Angayubagya sukma

Angolah raga

Sarana kewese wirama

Angolah jiwa

Sarana luhuring wirasa

Kuwi pratandha

Yen beksan  jawa

Kebak endahing pakarti mulya

Den pantes tinuladha

Dening para yoga

Ngluhurake  moncering bangsa

Sarana ngleluri budaya

Beksa jwa terwaca lan tumata

Misuwur ing nuswantara

Kawentar sakindenging bawana

$$$$$

AJINING JIWA

Dening : Eni Setyowati

GK,Minggu kliwon, 5-1-20

Rasa jroning dhadha manungsa

Sejatine alus tan rerupa

Rasa iku bisa kababar dening basa  lan sastra

Kanggone wong jawa

Rasa iku bisa kawedhar kanthi endahing sastra

Sastra kang rinakit saka ukara-ukara

kebak sanepa, pratandha lan patuladha

Amarga sastra iku bisa ngalusake rasa

Rasa asih tanpa pamrih

Rasa asah tanpa congkrah

Rasa asuh tanpa mingkuh

Rasa asung tanpa nlikung

Rasa among tanpa bombong

Rasa welas linambaran ikhlas

Rasa tepa mring sapadha padha

Ajining jiwa ana ing rasa

jiwaning jawa ana ing sastra lan budaya

Jawaning rasa manekung mring Hyang Kawasa.

$$$$$

AKU ORA KELANGAN

Dening : Enis Setyowati

 GK, Minggu kliwon, 5-1-20

Aku kelangan larikan

Kanggo mbencah kasunyatan

Karo ragamu

           

Aku kelangan ukara

Kanggo sarana angalembana

Endahing jiwamu,

Aku kelangan  basa

Kanggo sarana  ambabar rasa

Marang sliramu,

Aku kelangan kerata

Kanggo lambar lelumban

Mecaki  sukmamu…

Aku kelangan aksara

Kanggo nemoni sliramu …

geguritan

Ananging aku ora kelangan,

Endahing kasunyatan

Mring luhur lan ajining kabudayan

Kang wus nyawiji bebundhelan

Ana jroning ati linambaran

Paugeraning Pangeran

$$$$$