NASIB GEGURITAN ING MADYANING SAYEMBARA

DENING : ENIS

Penulis Antologi  Sastra lan Budaya Jawa
Dinas Kebudayaan ( Kundha Kabudayan ) DIY Tahun 2020

foto nalika acara temu sastra para penulis sastra jawa ing Hotel Neo Awana Ngayogykarta, November 2019

Dinten Selasa legi 14 Juli 2020 rasane uga legi /  manis ing jroning atiku, nalika ana warta saka kanca lan uga saka kundha kabudayan Ngayogyakarta. 

Alhamdullillah,Gusti Pangeran , Paduka paring berkah dumateng kawula ing satengahing pandemi virus corona menika.

Injih kanthi lolosipun naskah geguritan lan esai sastra budaya jawa , ingkang kawula kintun dumateng sayembara antologi sastra budaya jawa ingkang dipun biwarakaken ing Kundha Kabudayan(Dinas Kebudayaan) Ngayogyakarta kala wingi wulan Maret 2020. 

Maturnuwun, Gusti Pangeran ingkang tansah Ngesuhi Jagat.
Warta babagan pengumumam kaserat wonten ing : 
https://budaya.jogja.go.id/

Geguritan 1. 

SASMITANE RANGGAWARSITA

Karipta Dening : Eni Setyowati (Enis)

Serat Kalatidha , kaserat

Dening Raden Ngabehi Ranggawarsita

Pujangga panutup

Ing  kasunanan Surakarta

Kalatidha minangka

Pepiling kanggo  manungsa

Pepenget marang panguwasa

Pituduh kanggo ngluru  ajining  raga lan jiwa

Aja mung padha ngendelake bandha

Raga lan gebyaring donya

Ananging kudu tansah milang miling

Mring sadengah piweling

Kinanthenan ati kang dumeling

Bilih sastra utamining sastra jawa

Bisa ngalusake budi lumebering rasa

Nglarasake  endahing seni lan  basa,

Ngresepake budaya lan sastra

Kanggo nggayuh urip prayoga lan santosa

Asung tuladha mring sapadha-padha

Nora mung  ing nuswantara

Ananging uga kuncara

Tekan  manca nagara

Ayo padha ambyur makarya

Ing madyaning olah seni ,basa,
budaya lan sastra

Mligine jawa

Ben tansaya ngrembaka

Ngoyod cinagak prakosa

Tinanem bakuh kukuh laku  utama

Mring jiwane para mudha

Panerus  urip lan mekaring  bangsa.

 Gunungkidul, Jemuwah Legi 27 Desember 2019

Geguritan 2. 
VIRUS-VIRUS  SASTRA JAWA

Karipta Dening : Eni Setyowati (Enis)

Virus-virus sastra jawa

Wus wayahe diwenehi hawa

Wus sak trepe dititipi nyawa

Ben dadya sarana anggelar rasa

Ben dadya warangka angumbar jiwa

Virus-virus sastra jawa

Tambaho ngrakut anggonmu sengkut

Mlebu ing sela-selaning jamrut

Jamruting raga, jiwa lan rasa

Dadya  pangendah bawana

Kanggo pangayom , pangayem lan pamrayoga

Agesanging manungsa ing mayapada

Uga  dadya pepadang

Ing tembe ngadep  

mring Sang Hyang Maha Wenang

Kanthi  manthering diri lan ati

Linambaran  ajining budaya  jawi

Linandesan  kitab sucining Ilahi

Yogyakarta ( Hotel Neo Awana) ,Rabu, 27 November 2019

Geguritan 3. 
WISIK GIZIKING WENGI

Karipta Dening : Eni Setyowati (Enis)

Tan krasa ing pangrasa

Rasa kang wengi iki ndadari

Andadari saka obahing lathi

Satemah nunjem jroning ati

 Atiku wira wiri ...

ing gisiking wengi

Wengi iki tanpa winates

Antarane raga lan jiwa

Antarane rasa lan sukma

Kang nora bisa ...

Kaucap  ing  kojahe manungsa

Nora bisa kinira ing netraning jalma

Yen wengi iki…

Bakal dadi wengi pungkasan…

Uga bakal dadi wengi  kawitan…

Kang miwiti lan njalari

Tuwuh prenthule rasa handarbeni

Rasa hangrungkebi …

Rasa hanetepi …

Rasa hangayomi …

Rasa hangleluri …

Mring lestarine basa, seni,
sastra ,lan budaya jawi

Kang  migunani lan murakabi

Saengga gawe pepadhang  bawana

Bakal moncer sumrambah

Menyang  nagara  manca

Kebak pituduh , piwulang uga patuladha

Lantaran serat panyerat

Rinumat  jroning sastra kanthi murwat

Kanggo medharake  pangalembana

Mring endahing karya 

Sang Maha Pangripta

 Yogyakarta ( Hotel Neo Awana),  Rabu wengi,  27 November 2019

Geguritan 4. 
Gambuh Kanggo Muridku
karipta dening : enis

Pra siswa yo dha nandur

Nandur rasa mring pakarti luhur

Anyingkiri laku nora migunani

Kanggo santosaning qolbu

Jer uripe ayem ayom

Pra siswa yo dha sengkut
Anggonira padha ngangsu kawruh
Migunani tumrap dhiri lan nagari
Bundhelana kanthi bakuh
Nggegulanga aja kendho

Pra siswa yo dha ngluru

Ngluru ngelmu sarana meguru

Kanthi niyat laku ati ingkang suci

Aja sira dha kapincut

Godaning donya kang muspra

Pra siswa yo dha manut
Dadya yoga kang mbangun miturut
Mituruto mring laku dhiri kang aji
Ngedohono pokal angkuh
Uripe bakal kepama

Pra siswa dha mituhu
Ngudi ngelmi lumeber pitudhuh
Lelandesan mring paugerane Gusti
Kanthi ati ingkang kukuh.
Berbudi bawa laksana

Gunungkidul, Kamis kliwon, 26 Desember 2019

Geguritan 5. 
Gambuh Kagem Guru

karipta dening : enis

Bapa lan ibu guru

Laku nira digugu ditiru

Mbabar ngelmu miguna mring para siwi

Kanggo nggayuh urip luhur

Dadya satriyo kang pagon

Pra dwija dha satuhu
Medhar sabda pitutur kang baku
Tutur tinularno mring bebrayan sami
Subasita den winengku
Jujur ujar pacelathon

Pra dwija yo dha mangun

Mangun karya linambar pitudhuh

Ambangun drajating bangsa lan nagari

Adhedhasar budya luhur
Lestari tekan samengko

Gunungkidul, Jemuwah Pon , 3 Januari 2020

$$$$$$