MACAPATAN MEKARSARI KEDAULATAN RAKYAT

 Dening : Eni Setyowati ( Enis )

Kedaulatan Rakyat terbitan Jumat Legi, 19 Juni 2020 ( 27 Sawal 1953 / tahun LXXV No. 253 ), ing rubrik Budaya lan Mekarsari kaca / halaman  17, tak temokke tulisan guritku kanthi irah-irahan " Macapatan " Korona Jroning Gambuh ". kang kapacak sisih ngisor tengen rubrik Mekarsari.

Alhamdulillah, Gusti ," ucapku neng jroning ati kanthi kebaking kabungahan amarga orek-orekanku bisa ngrenggani koran dinan ing tlatah Ngayogyakarta iki.

Gurit kuwi dak susun nalika  wulan Maret, sajroning wabah corona kang lagi regeng-regenge mlebu lan dadi pawarta kang lagi mumbul ing  bumi Indonesia.

Korona Jroning Gambuh 

karipta dening : Eni Setyowati

Warta kang lagi mumbul

Sajroning masyarakat kacatur

Anggawe udreging kahanan nagari

Kasebut korona virus

Sumebar saka Tiongkok

Korona iku virus

Kang anggawe umyeking pangrungu

Mula kudu njaga dhiri uga lathi

Aja dha kakean wuwus

Ujar kang pantes cinonto

Korona iku tatu

Kang nilas ing sajroning pandulu

Katon wela akeh bebanten pepati

Mangga kita sami guyub

Tansah asih asuh among

Korona iku mungsuh

Anggawe kahanan sarwa kisruh

Mula kadang ayo padha meper ati

Njaga kawruh ingkang jumbuh

Ngugemi warta sayektos

***

Gunungkidul, Setu Legi 21 Maret 2020