KIDUNG BUMI HANDAYANI

KARIPTA DENING : ENIS

Gunungkidul ...

katelah  Bumi Handayani

salah sawijining papan antik ...

ing laladan Kraton Ngayogyakarta

Gunungkidul ...

nduweni tradhisi kang tansah kamemetri

Nduweni giri-giri kang tansah 

setya tuhu mageri bumi

Nduweni papan wisata kang maneka warna

Nduweni dhaharan lokal kang ngangeni 

Nduweni masarakat kang sarwa prasaja

Nduweni mawarni-warnai tata budaya aji 

kanggo urip lan panguripan kang sarwa andayani.

Dak ripta geguritan iki..

kanggo memetri lan ngleluri 

maneka warna tradhisi

mawarni tata nilai budaya jawi aji

kang tansah ditaberi lan dileluri 

dening masarakat bumi handayani

mungguhing pra mudha siwi

ing tembe mburi 

kanggo neruske lakuning bumi

nganti tumekeng pati 

 

Hangrungkebi, handarbeni, 

handadagi, hanetepi,

lan hangleluri bumi handayani

Asung darma bekti 

mrih mekaring nagari

Sarana tradhisi lan pitutur-pitutur aji 

saka para leluwur adi 
kang laras lan nyawiji 

karo paugeraning Gusti
Kang Maha Siji

muga dadya sarana angumbar rasa

angenam raga, ambabar jiwa,

anggelar budaya saengga bisa

 

kanggo amemayu hayuning sarira,

amemayu hayuning kulawarga, 

amemayu hayuning sasama, 

amemayu hayuning nagara lan bawana

 

kanthi linandesan paugeraning agama

Kang wus tumata dening Kang Maha Akarya

**

Gunungkidul, Jumat Pahing 14 Agustus 2020